بسم الله بسمل، د انتخاباتو د مستقل کمېسون رئيس

ماسټري يې د کېميا په څانګه کې لاسته راوړې ده. د هرات د ښوونې او روزنې د ډيپارټمنټ د رئيس په توګه يې دنده تر سره کړې ده. د روسانو د يرغل پر وخت د افغانستان د مقاومت غړى و. په انتقالي حکومت کې يې د ملي هوانوردۍ او توريزم د وزير په توګه دنده تر سره کړې ده.

ستر جنرال ايوب اصيل، د انتخاباتو د مستقل کمېسون مرستيال

ماسټري يې د حقوقو په څانګه کې د مصر د هېواد څخه لاس ته راوړې ده. نوموړى د جنايي عدالت او د بشر د حقوقو په څانګو کې هم په جاپان او فرانسې کې زده کړې کړي دي. د کابل د حقوقو په پوهنځي کې يې د ښوونکي په توګه او هم يې د مخدره موادو پر ضد د مبارزې د عمومي رئيس په توګه دندې تر سره کړي دي. نوموړى د روسانو د يرغل پر مهال د افغانانو د مقاومت د فرهنګي ډيپارټمنټ رئيس هم و.

محمد نظري، د انتخاباتو د مستقل کمېسون غړى

ماسټري يې د ژورناليزم په څانګې کې د ازبکستان له هېواد څخه لاس ته راوړې ده. د کابل او بلخ په پوهنتونونو کې يې د ژورناليزم د ښوونکي په توګه او هم يې د اطلاعاتو او فرهنګ د وزارت په نشراتي څانګه کې دندې تر سره کړي دي. په بېړني لويه جرګه کې د سمنګان د ولايت د انتخاباتو مسوول او د رايو د شمېرنې د کمېسون غړى و. د اساسي قانون او جمهوري رياست په انتخاباتو کې د شمال د ولاياتو مسوول و.

نجلا ايوبې، د انتخاباتو د مستقل کمېسون غړې

لوړې زده کړې يې د حقوقو او سياسي علومو په څانګو کې د ماسټرۍ په کچه د تاجکستان په پوهنتون کې کړي دي. نوموړې د څارنوالۍ د کادر غړې ده او هم قضايي انسلاک لري. په ١٣٨٢ کال کې د اساسي قانون د کمېسون او د اساسي قانون د لويې جرګې، عامه رايه اخستنې، عامه معلومات (څرګندونو) مسووله وه. د اساسي قانون د تدقيق کمېسون د نشريې د تحرير د هيات غړې هم وه او وروسته بيا د انتخاباتو د ګډ دفتر د دارالاانشا د عامه آګاهۍ او د عامه اړيکو مسووله وټاکل شوه.

مستوره ستانکزۍ، د انتخاباتو د مستقل کمېسون غړې

د کابل پوهنتون د ښوونې او روزنې د پوهنځي څخه يې ليسانس لاس ته راوړى دى. په سوريا لېسه کې يې د ښوونکې او هم د پښتو د ډيپارټمنټ د آمرې او هم وروسته يې د مديرې په توګه دندې تر سره کړي دي. په بېړني لويه جرګه کې يې د ايران د مهاجرينو د وکيل په توګه استاځيتوب کاوه او په وروستيو کې يې د ښوونې او روزنې د وزارت د لومړنيو زده کړو د رياست د علمي او مسلکي غړې په توګه دنده تر سره کوله.

عبدالحکيم مراد، د انتخاباتو د مستقل کمېسون غړى

د کابل د کرنې د پوهنځي څخه يې ليسانس لاس ته راوړى دى. ماسټري يې د عامه ادارې په څانګه کې د پاکستان د پېښور په ښار کې د پرسټن د پوهنتون څخه تر لاسه کړې ده. د اوبو رسولو وزارت، د افغانستان لپاره د سويډن د کمېټې، د اکبر د موسسې، يو اېن ډي پي او د کليو د بيا رغولو او پراختيا له وزارت سره يې دندې تر سره کړي دي او هم يې د انتخاباتو د تنظيم د ګډ دفتر د دارالاانشا سره د کابل د ساحوي زون د کوآرډېنېټر په توګه دندې تر سره کړي دي.

ډپلوم انجنير کشن سنګ هنر يار، د انتخاباتو د مستقل کمېسون غړى

د پولي تخنيک د پوهنځي څخه يې د کېمياوي صنايعو په څانګې کې ماسټري اخستې ده. نوموړى د نغلو د برېښنا د بند د آمر په توګه، د نغلو، سروبي، ماهيپر او مزار شريف د برېښنا د توليدولو د رئيس په توګه، د غوري سمنټو د فابريکې د رئيس په توګه، د نساجئ افغان د معاون، د سوداګرۍ د وزارت د پلان د رئيس او د صنايعو او کانو د وزارت د اداري رئيس په توګه دندې تر سره کړي دي.

سمېع الله تازه، د انتخاباتو د مستقل کمېسون غړى

ليسانس يې د کابل پوهنتون د ادبياتو د پوهنځي د ژورناليزم له ډيپارټمنټ څخه لاس ته راوړى دى. د اطلاعاتو او فرهنګ په وزارت کې يې د باختر په اطلاعاتي آژانس کې د ژورنالسټ په توګه دنده تر سره کړې ده. د پامير جریدې د ښوونې او روزنې د څانګې مدير، او وروسته يې د باختر په آژانس کې د نړيوالو راډيوګانو د عمومي رئيس په توګه دندې تر سره کړي دي. نوموړى د افغان-جرمن د بنسټيزو روزنو په موسسه کې د کوآر ډېنېټر په توګه او وروسته يې بيا د کنړ او نورستان په ولايتونو کې د مديرا انټرنشنل موسسې د ساحوي رئيس په توګه دندې تر سره کړي دي.

مومنه ياري، د انتخاباتو د مستقل کمېسو غړې

ميرمن مومنه ياري د حاجي سليمان ياري لور د کابل په ولايت کې زيږيدلې. ميرمن يارى د پيښور پوهنتون د شرعياتو له پوهنځي څخه فارغه شوې. نوموړې د بشري حقوقو په خپلواک کمېسيون کې د ښځو د حقوقو د پرمختيا او ملاتړ په څانګه کې دنده تر سره کړې. ميرمن ياري په بيړنۍ لويه جرګه او د اساسي قانون په لويه جرګه کې استازې وه. ميرمن ياري ته دا افتخار په برخه شو چې د اساسي قانون په کمېټو کې د لومړنۍ ښځې په توګه کار وکړي. نوموړې په پښتو، دري، اردو او انګريزي باندي خبري کوي..

نور محمد د انتخاباتو د تنظيم ګډ دفتر نړيوال غړى:

د ١٩٩٤ کال راهېسي نورمحمد د هندوستان د انتخاباتو د کمېسيون د غړي په توګه کار کړى. نوموړي په هندوستان کې د انتخاباتو د کمېسيون اداره پرمخ بيولې او د ولسمشرۍ د انتخاباتو، پارلماني انتخاباتو او د ايالتي مقننه ځواکنو د انتخاباتو په تياري او پرمخ بيونې کې همکاري کړې.

جوليَن ټايپ د انتخاباتو د تنظيم ګډ دفتر نړيوال غړى:

جوليَن ټايپ د انتخاباتو په اداره کې د اسټراليا د انتخاباتو له کميسيون سره ٢١ کاله د کار تجربه لري. ښاغلى ټايپ د ټاسمينيَن د عدالت له ډيپارټمنټ څخه، چېرې چې دى خدمتې استول شوى وو، د ټاکنو د پولو په معلوملو کې پوره تجربه حاصله کړې او د انتخاباتو په سيستمونو کې پخه تجربه لري. په نړيواله کچه د نوموړي د انتخاباتو تجربه په لاندې ډول ده: کمبوديا (١٩٩٣)، انډونيزيا (١٩٩٩)، ختيځ تيمور (٢٠٠١ – ٢٠٠٢) او افغانستان (٢٠٠٤ – تر دې مهاله)